Mir bastelen e Kazoo an eng Samba-Trommel

Mam Bob a mam Eric

Wëlls du Fuesmusek maache wéi zu Rio de Janeiro? Da bastel mat eis e Kazoo (Blosinstrument fir dran ze sangen) an eng Surdo (Samba-Trommel). Spill mat eis Sambamusek an d’Fuesent ka kommen.
Heifir braucht dir:
Fir de Kazoo: Toiletterullo, Bakpabeier, Lastiker, Schéier, Cutter.
Fir d’Trommel: Schnéibiesem, eng Strëmp oder Läppchen, eng Corona-Mask, e Botzeemer, e Stéck Karton sou grouss wéi den Eemer, e Kichenduch, eng Schnouer.

Ca. 40 Minutten

Kannertheaterproduktioun, bei där d’Milla Trausch an den Dan Tanson d’Geschicht verzielen.

Mam Nathalie

D’Mustik an de Sputt bereeden déi grouss Parad vum Karneval der Tiere vir. Dobäi begéine se enger Hellewull Déieren a se verléiere sech ëmmer méi dacks an der Phantasiewelt vun hirem Spill. Wa jiddereen do ass, kann et endlech lass goen. An da gëtt sou richteg gefeiert!

Ca. 50 Minutten

Kodéiere mat Faarwen

Mam Joël a Paul

Kanns du programméieren? Weess du wat eng Computersprooch ass? Wat brauchs du fir ze kodéieren?
- Zesumme baue mir eisen 1. Computerprogramm mat Faarwen. Vun doheem aus kanns du matmaachen a spilleresch léiere wat en Algorithmus, eng Schläif an Debugging ass. „Denk“ wéi e Computer a so du de Maschinnen, wat se maache sollen.
Du brauchs: Blieder mat Haisercher, deng Faarwen an deng Schéier!

Ca. 45 Minutten

Mir bastelen eng Konfetti-rësel-Kaart an ee Pompom-Bam

Mam Edith

Fir d’Kaart braucht dir:
2 faarweg fest DIN A4-Zeecheblieder - méi dënn faarweg Blieder - eng Plastikstut, déi e bësse méi kleng ass wéi d’Zeecheblieder - Konfetti oder e Locher - Stëfter, Bläistëft, Schéier a Pech

Fir de Pompom-Bam braucht dir:
E futtissen Aascht, deen een dobausse fënnt an iwwer Nuet op der Heizung dréchne léisst, dee soll ee virdrunner a senger Liiblingsfaarf usträichen - vill Pompomen an alle Gréissten a Faarwen, Knäpp, 2-3 ënnerschiddlech faarweg Wollfiedem, Pech.

Ca. 35 Minutten

E Prënz, deen eng Prinzessin sicht, an eng Kinnigin, déi sech un en uralen Prinzessinen-Test erënnert...

Mam Annick a mam Eric

D’Figuren aus dësem bekannte Mäerche vun de Gebridder Grimm sinn aus Holzlaten aus enger aler Wäikëscht gebaut. Duerch déi kleng Figuren illustréiert, eegent sech dës Erzielung och fir ganz kleng Kanner a fir jiddereen, dee sech gäre vun Märecher verzaubere léisst.

Ca. 20 Minutten

Zaubertricks a Rätselen mat Mathe

Mam Frauke a Filipe

Wärend der Sendung "Mathe-Zaubershow fir matzemaachen" léiers du zesummen mam Frauke a Filipe eng Partie einfach Zaubertricken a Rätselen, mat deenen du deng Frënn an deng Famill beandrocke kanns. Fir bei der Mathe-Zaubershow matzemaachen, brauchs du just e puer Alldagsgéigestänn (Zahnstocher, Kaartespill, Bic an e Ziedel).

Wann s du een Drécker hues, da kanns du dir och d’Blat fir dee leschten Zaubertrick HEI erausdrécken.

Ca. 30 Minutten

Zesummen op Jerusalema an aner flott Lidder danzen.

Mam Laura

Matenee wierme mir eis op flott Musek op, éier mir op e Lidd e schéinen Danz léieren. Danze mécht Spaass, hält fit an trainéiert nach ganz niewebäi eis Koordinatioun a rhythmesch Fäegkeeten. Fir dës Aktivitéit brauchs du just e bësse Plaz a Kleeder, an deenen s du dech fräi beweege kanns.

ca. 45 Minutten

Op der Sich nom Danzi Danznéckel

Mam Benzilla a Wuhuu

Danz mam Benzilla a mam Wuhuu duerch eng verréckten Dramwelt.
Hëllef dobäi Kodéier-Rätselen ze entschlësselen an danz mat eis bis d'Féiss dämpen.

Ca. 45 Minutten

Schreiw a spill däin eegene klengen Theatertext.

Mam Yann

1,2,3 a lass…ech maache mech doheem op d’Sich no Kleeder an Accessoiren, déi mir gefalen an entwéckelen doropshin dramatesch a witzeg Theaterzeenen. Mir schaffen zesummen un der Kierpersprooch. Mir probéiere spilleresch, mat Hëllef vu Musek a vill Energie verschidde Rollen an Emotiounen aus an entwéckelen ee kuerzen Theatertext. Wéi preparéieren ech mech als Schauspiller, Schauspillerin op meng Roll a mäi Mini-Theaterstéck-Doheem?
Ca. 40 Minutten