Mam Johannes

Wëlls du een Instrument spillen, wat s du net kafe muss? Kee Probleem! Benotz einfach däi Mond. Human Beatbox oder Beatboxing ass déi coolste Manéier Musek ze maachen. Mam Johannes, och bekannt als Apollon Beatbox, léiers du séier an einfach alles, wat s du brauchs fir Beatboxing ze maachen.

ca. 40 min

Mam Annick an Eric

“Et wor emol matten am Wanter an d’Schnéiflacke si wéi Plomme vum Himmel gefall. Do souz eng Kinnigin bei der Fënster an huet gebitzt. A wéi si sou gebitzt an dem Schnéi nogekuckt huet, stécht se sech mat der Nol an de Fanger an et falen dräi Drëpse Blutt an de Schnéi. A well dat Rout am wäisse Schnéi esou schéin ausgesinn huet, duecht si bei sech: "Hätt ech dach e Kand, esou wäiss wéi Schnéi, esou rout wéi Blutt an esou schwaarz, wéi d’Holz vu menger Fënsterrumm". …”

Dat klassescht Mäerche vun de Gebridder Grimm erzielt, mat Figuren aus der Boma hirer Bitzkëscht.

ca. 20 min.

Mam Laura

Matenee wierme mir eis op flott Musek op, éier mir op e Lidd e schéinen Danz léieren. Danze mécht Spaass, hält fit an trainéiert nach ganz niewebäi eis Koordinatioun a rhythmesch Fäegkeeten. Fir dës Aktivitéit brauchs du just e bësse Plaz a Kleeder, an deenen s du dech fräi beweege kanns.

ca. 45 Minutten

Dat Flottst um Theaterspillen ass, dass ee kee Feeler maache kann…ausser…guer net op d’Bün ze goen! Wann ech also bis op menger Bün sinn ass all Iddi, Gedanken, Saz a Beweegung gutt. Spaass hunn a Spaass ginn ass wichteg.

Wichteg ass och, datt ech eng Iddi op 100 verschidde Manéiere spille kann a meng Kreativitéit keng Grenze kennt....A lass!

ca. 30 min.

An engem Orchester ginn et verschidden Instrumentegruppen, an déi eng bléist een, op déi aner schléit een, a nach anerer kann een zupfen. Mat einfache Materialie bastele mir dës Instrumenter doheem no, kucken a lauschteren, wéi den Toun entsteet a kléngt.

Heifir braucht dir: Pabeier (DIN-A4), ee Stéck Kartong z.B. vun enger Müsliskëscht, eng kleng Këscht aus Kartong z.B. vun tomates cerises, Schéier a Lasticker a verschiddene Gréissten. A fir déi ganz motivéiert och nach: een Triichter, ee Stéck Schlauch (1m), en Uschloss fir de Schlauch un de Krunn ze maachen.