Fir den Engagement, d’Kreativitéit an d’Motivatioun vun de SchülerInnen (EF, ES) ze promouvéieren an z’ënnerstëtzen, lancéiert d’Equipe vum Internetsite www.eduart.lu de Konschtchallenge “LESCHT JORHONNERT DADA & HAUT GAGA” a proposéiert dir mat deem, wat s du doheem hues, oder normalerweis géifs ewechgeheien eng “GAGA-Skulptur/Figur” z’entwerfen, ganz am Stil vum Duchamp sengem “Objet trouvé”.

Alles wat s du dofir brauchs si gebrauchte Géigestänn, Verpackungen, eidel Wäschmëttelbehälter, Reschter Stoff, Plastikstuten, Jughurtsdëppercher, Eeërkartong ... an e bëssi Verrécktheet!

Nodeems de däin “Objet trouvé” kreéiert hues, sichs de der doheem eng neutral Plaz als Kuliss a knips en mat denger Handyskamera. Maach der och gäre Gedanken zu der Beliichtung an der Inzenéierung vun dengem “GAGA-Konschtwierk” an iwwerlee der och ee “GAGA-Titel”.

E puer kleng nëtzlech Tricken/Rotschléi:

• Sammel doheem esouvill verschidde gebrauchten, resp. eidel Géigestänn, wéi s de fanne kanns, fir dass de ënnerschiddlech Figuren entwerfe kanns an dono déi beschten, oder soll ee soen, déi am GAGAsten, auswiele kanns.

• D’Géigestänn u sech, däerfe liicht manipuléiert oder verännert ginn.

Enregistréier d‘Foto vun dengem „Objet trouvé“ ënnert folgendermoossen: Numm_Virnumm_Titel a schéck et op eduart@men.lu bis spéitstens den 15. September 2020!

Erklärungen a Beispiller:

• „Objet trouvé“: (fr. Géigestand, dee fonnt ginn ass) = een Alldagsgéigestand, dee fonnt ginn ass, mat Gebrauchsspueren. Duerch d’weil vum Géigestand an enger liichter Weiderveraarbechtung, déi am beschten de Sënn verännert, gëtt et zum Konschtwierk.

• Robert Rauschenberg, APPALACHIAN DOUBLE LATCH SPRING GLUT, Assemblage, Metallteile, 1989

• Jack Milroy, SARDINE PICCANTI, Objet trouvé, 2013

• Romuald Hazoumè, WAX BANDANA, Objets trouvés, 2009

Den Internetsite www.eduart.lu ass di offiziell Plattform fir Konschtunterrecht zu Lëtzebuerg (ESC an ESG) a proposéiert dem Public, SchülerInnen a Léierpersonal, souwéi all aneren Konschtintresséierten eng Vitrinn déi all méiglech Facetten vum Fach regroupéiert.