Fir den Engagement, d’Kreativitéit an d’Motivatioun vun de SchülerInnen (EF, ES) ze promouvéieren an z’ënnerstëtzen, lancéiert d’Equipe vum Internetsite www.eduart.lu de 5. Konschtchallenge Meng Geschicht, mäi Film a proposéiert dir mat deem, wat s du doheem hues, oder normalerweis géifs ewechgeheien, deng Geschicht unhand vun der sougenannten Stopmotion-Technik (Erklärvideo) z‘erzielen.

Alles wat s du dofir brauchs ass deng Handyskamera oder d‘Kamera vun dengem Tablett, Géigestänn, Pabeiersschnëppselen, eng Kuliss an eng roueg Plaz, déi gutt beliicht ass. Denk dir eng Geschicht mat de Géigestänn aus: d’Geschicht ka real sinn, dat heescht sech op d‘ Wierklechkeet baséieren et kann natierlech och eng erfonnte Geschicht sinn. Wann deng Geschicht bis feststeet, gees du op eng roueg Plaz, wou keen dech beim Schaffe stéiere kann, lee dir deng Géigestänn prett, fixéier Handy oder Tablett, fir datt en net verrëtschen oder wackele kann, a maach zum Beispill d’Applikatioun Stop Motion Studio (IOS) op a da kanns du mat denger Geschicht starten.

E puer kleng nëtzlech Tricken/Rotschléi:

• Installéier eng Luucht fir deng Zeen gutt ze beliichten, wann de Raum net ëmmer hell ass.
• Du kanns roueg mat engem aneren zesumme schaffen, esou mécht et nach méi Spaass an du kënns och méi séier virun esou: du réckels d’Géigestänn an däi Partner mécht d’Fotoen oder ëmgedréint. Pass op, datt keng iwwerflësseg Informatiounen oder deng Hand mat op d’Fotoe kommen, ausser et ass gewollt.
• Wann däi Film bis fäerdeg ass, kanns du Toun bäisetzen: deng Stëmm, eng Melodie, deng eegen oder Musek, déi lizenzfräi ass.

Enregistréier deng Animatioun ënnert folgendermoossen: Numm_Virnumm_Titel an schéck et op eduart@men.lu bis spéitstens den 8. Juni 2020. Opgepasst, doduercher datt et mat grousser Warscheinlechkeet eng grouss Datei wäert sinn, schéck et iwwert de Site wetransfer.com. Zéck net fir Hëllef vun engem Erwuessenen ze froen.

Erklärungen a Beispiller:

• Tutoriel Stop Motion Studio APP: Link
• Animatiounsbeispiller mat Emojis (Video Testbeispill EF, Cycle 3): Link
• Animatiounsbeispiller (Videoen ES): SLP Pinguin SLP: Link / LAML The Origamibirds: Link / LAML Melting, burning & more: Link
• Olivier Pesch, lëtzebuergesche Stopmotion-Kënschtler (Foto ënnen op der Säit)
• Animatiounsbeispiller mat Pabeierschnëppselen: Link a Video: Link

• Lizenzfräi Musik: Link

eduart.lu

Den Internetsite www.eduart.lu ass di offiziell Plattform fir Konschtunterrecht zu Lëtzebuerg (ESC an ESG) a proposéiert dem Public, SchülerInnen a Léierpersonal, souwéi all aneren Konschtintresséierten eng Vitrinn déi all méiglech Facetten vum Fach regroupéiert.