Du wollts schonn ëmmer mol e Film dréinen an domadder aner Leit inspiréiere? Bei dëser Challenge bass du Produzent*in, Regisseur*in, Kameramann/Fra, Cutter*in an Alldagsverbesserer*in an enger Persoun!

 

D’Aufgab

Dréin e kuerze Film mat dengem Handy zum Thema Doheem. Weis däi „néien“ Alldag an/oder beschreif deng homeschooling-Situatioun!

 

Wat s de brauchs

• E Smartphone a gratis Software fir d’Filmer ze schneiden (iPhone: iMovie, Android: filmoraGo, déi zwee sti gratis am App/Google-Store zur Verfügung)
• Eng ënnerschriwwen Averständneserklärung (am PDF-Dokument ënnen op der Säit) vun all Persounen, déi s du gefilmt hues, fir dass däi Film spéider kann online gestallt ginn

 

Iwwerlee dir eng kuerz Story

 

• Wat huet sech zanter dem homeschooling bei dir doheem geännert?
• Wéi kriss du d’Zäit ëm?
• Wat nervt? Wat ass mega?
• Wat hellst du aus dëser ongewinnte Situatioun mat fir di Zäit dono?
• An dat Wichtegst: Wéi eng Tipps wëlls du aner Jugendlecher mat op de Wee ginn?

 

Deel deng Story an dräi Deeler op an notéier dir e puer Saachen

•  Aféierung (Ëm wat geet et?)
• Beschreiwung vun der Situatioun (Dat leeft richteg schlecht/nervt...)
• Léisungsvirschléi (Dat si meng Tips: ...)

 

Fänk un mat filmen

• Schwätz selwer an d’Kamera
• Looss dech beim Léieren oder an dengem Alldag filmen
• Beschreif a film bestëmmt Situatiounen
• Maach en Interview mat dengen Elteren oder mat aner Léit oder Frënn, mat deenen s du Kontakt hues (z.B. och iwwer Skype, Facetime, Teams); denk drun, dass du eng Averständneserklärung vu jidderengem frees, de s du films
• Looss däi Film wuessen

 

Nobeaarbechtung

 Zéi dono däi Material an de Programm fir d’Filmer ze schneiden an dann kanns du de Film beaarbechten. Du wäers gesinn, et ass einfach an et mécht vill Spaass!

E puer Tipps fir Filmer selwer ze dréinen a ze schneide gëtt et hei:

• Tips op Däitsch
• Tips op Franséisch
• Tips op Englesch
• Tips op Portugiesesch

Däi Film sollt maximal 2 Minutten daueren.

 

Aschécken

Schéck däi Film, wann en fäerdeg ass, zesumme mat de signéierten Averständneserklärungen iwwer wesendit.com un challenge@script.lu. Stéchdatum ass den 18. Mee 2020.

 

Gewënn

Fir déi 5 bescht Filmer gëtt et eng Visite guidée an de Filmland-Studios zu Kehlen/Lëtzebuerg a jeeweils eng DVD aus dem Paul Thiltges Distributions Shop.